facebook
twitter
Youtube
Ammon on Apple Store
Ammon on Play Store
مواعيد الطيران
مواعيد الصلاة
rss
  • اخر التحديثات
  • الأكثر مشاهدة




عماد والبطاطا و الزيادة


كامل النصيرات
10-09-2007 03:00 AM

كنتُ قد حدثتكم قبل مدّة عن ( عماد و كرتونة البيض ) ..إذا كنتم تذكرون ..؟؟ يبدو أن ( عماد ) هذا سيصبح قدري ..لأنه نموذج أردني بامتياز ..ويملك من حكايات اللسوعة ما تملكونه أنتم ..فهو يعرف كيف ينتج العرق ولكنه يعجز للآن عن مسح العرق ..ويعرف كيف يقف قدّام بيّاع البطيخ والشمام ولكنه أعجز من أن يفرح ببطيخة أو شمّامة ..عماد هذا ..مثلكم تماماً ..بدأ يفقد الذاكرة وصار لديه خلطٌ عجيب بين الموزة ( ما غيرها ) و الخيارة ما ( غيرها أيضاً ) ..لأنه اقترب من نسيان لون الاثنتين ؛ بس ما زال يتذكر أن الخيارة والموزة لهما شكل الخازوق ؛ عشان هيك مش ناسي الشكل أبداً ولا رح ينساه ..!!عماد المواطن الأردني ؛ يترحم على أيّام البطاطا إللي كان يشتريها بالكيلوات ..والآن يشتريها بالحبّة ؛ ضحك وقال : يعني زي أوروبا ..!! بس زي أوروبا غصب عنّو مش بخاطر إللي خلّفوه ...!! قال لي عماد : أمّا اشتريتلك حبيتن بطاطا ..شو يا خوي يا كامل ..أحلى ما فيهن سعرهن ..الحبّة بربع ليرة ..بس شو ؛ الحبّة بتحكي ..!! قلت له : يعني الحبّة بتوزن ونظيفة ..!! قال : لا بتوزِّنْ ولا زفت ..يا دوب قد كفّة الإيد وبربع ليرة ..ووحدة من الحبتين طلعت في الندامة يعني خربانة ..بس والله ما زعلت عليها ..لأنو من حقها تطلع هيك ؛ هاي حبّة بطاطا يا عمّي يعني بدها تضحك بوجهي أنا ..مهي عارفتني فقري ابن فقري ..لو إني من الناس إللي فوق كان طلعت مقلية أو مسلوقة لحالها ...بس يا الله ..رح نوكلها مهما كانت خربانة ..حقها ربع ليرة مش أي كلام ...!!
جمع عماد أولاده بالليل و ذات تفاؤل ..وقاللهم طفّوا الكهربا وكل الأضوية بدّي أحكيلكو خبر مفرح رح يخلّي الدار تنوِّر لحالها ..قالوا الأولاد : احكي يا بابا ..بس لا تسرع بالحكي لأننا بانتظارك ..!! قال عماد وهو يفرك يديه بالعتمة و يتشدّق بالحكي : خلص يا اولاد ..رح تيجينا زيادة عَ الراتب ..كبّوا بواطكو القديمة إللي أصابع رجليكو طالعة منها ..وخلص يا اولاد رح ( نكسيكوا ) ..فيه زيادة على الطريق ..!! وأكمل لي عماد : ونطنط الأولاد ( هيهيهيهيهيهيهيههه ) ولحد الآن لما يشوفوني يقولوا ( هيهيهيهيهيهيهيههه ) ..وأجتْ الزيادة يا خوي يا كامل ؛ بس الله لا يجيب الدرب إللي جابتها ..طلعت الزيادة نُقصان ..الله ينقص من عمر إللي قاصد ينقِّص من عمرنا ..!!
وما زال عماد ..يحلم بالرجوع إلى البطاطا أم الكيلو ..وبالرجوع عن الزيادة على الراتب لأنها طلعت دمار وإغبار و إشحار ..وأهلاً رمضان ؛ عماد ليس بانتظارك..!!





  • لا يوجد تعليقات

تنويه
تتم مراجعة كافة التعليقات ،وتنشر في حال الموافقة عليها فقط.
ويحتفظ موقع وكالة عمون الاخبارية بحق حذف أي تعليق في أي وقت ،ولأي سبب كان،ولن ينشر أي تعليق يتضمن اساءة أوخروجا عن الموضوع المطروح ،او ان يتضمن اسماء اية شخصيات او يتناول اثارة للنعرات الطائفية والمذهبية او العنصرية آملين التقيد بمستوى راقي بالتعليقات حيث انها تعبر عن مدى تقدم وثقافة زوار موقع وكالة عمون الاخبارية علما ان التعليقات تعبر عن أصحابها فقط .
الاسم : *
البريد الالكتروني :
اظهار البريد الالكتروني
التعليق : *
بقي لك 500 حرف
رمز التحقق : تحديث الرمز
أكتب الرمز :