قبل أسبوع تقريبا استقبل رئيس الوزراء في مكتبه وفد مجلس العموم البريطاني برئاسة كريسبين بلنت، وبدل أن تم استعراض تداعيات الأزمة السورية على الاردن.. كان الأبدى أن يتم استعراض تداعيات "هبشة" الكردي على الاردن طالما "متقند" عندهم !!

كان يمكن للرئيس أن يستأذن من الحضور ويقول: أخ "كريسبين" ممكن جوز كلام، كريسبين: أوكي دولة الرئيس، الرئيس: ترى الناس للناس، "كريسبين": yes الـ people للـ people، الرئيس: تراني قاصدك، كريسبين: من "eyes" هاي قبل "eyes" هاي، الرئيس: تسلم "eyes" وأصحابها، ترى زي ما أنت عارف رفعنا كل شيء والموازنة بعدها "مطوقعة"، "كريسبين": بليز دولة الرئيس شو قصدك "مطوعئة"، الرئيس: تعال أوشوشك….، "كريسبين" : ههههههههههه أوكي دولة الرئيس راح نزيد المساعدات للاردن، الرئيس: يازلمة زهقنا المساعدات أنا بدّي تساعدني باسترجاع "الكردي" هاظ لحاله بغنيني، "كريسبين": واو.. بس أنا في حياتي ماسمعت أنه "البيزنطيين" عندهم مثل هذا الاسم، الرئيس: يازلمة شو دخل البيزنطيين ؟! "كريسبين": ما أنت بتقول بده يغنيك هذا أكيد تمثال بيزنطي مرصع بالذهب تم تهريبه من الاردن الى بريطانيا وتطالب باسترداده، الرئيس: لا وانت الصادق هذا "شبح" لفح أكثر من 500 مليون دولار من أموال الفوسفات وشرد، "كريسبين": "whats" ؟! أكيد بتمزح، الرئيس: لا والله مابمزح، "كريسبين": يازلمة حتى "الشبح" إذا كان معه 500 مليون دولار بتشوفه بالعين المجردة من مسافة 100 ميل، الرئيس: عاد كانت ساعة شيطان وما شفناه، "كريسبين" : المطلوب ؟! الرئيس: ترى ذكروه الاجاويد أنه في لندن !! "كريسبين" : "no" دولة الرئيس، "بليز" دولة الرئيس لندن بلد مافيها "حرامية" !! الرئيس: يا زلمة وطّي صوتك مين قلّك إنه "حرامي" !!

"كريسبين" : انت دولة الرئيس واحد شفط "500″ مليون شو بكون يعني "سو برمان" ، الرئيس: يازلمة هذا في الاردن اسمه "سوء إدارة" بترجاك لا تكبر الموضوع،

"كريسبين" : "ولّ" إذا كان سوء الادارة بنفقد فيها "500″ مليون معنى ذلك "السرقة" بنفقد فيها الاردن !!
الرئيس: من الآخر بدك تساعدني ولا لأ، "كريسبين": كيف ؟! الرئيس: ياخوي هذا الشعب كل ما أرفع عليهم رفعة بحكولي رجّع مصاري الفوسفات، بس اذا صدفت الكردي في شارع، في مطعم، في مول، في كافتيريا احكيله: أبو زهير بسلم عليك واستهدي بالله و"ارجع" !!

"كريسبين" : أبو زهير هذا شفط "500″ مليون مش طالب جاب 2 من 10 وفل من الدار وبدّك إياه "يرجع" ، الرئيس : ها ياخوي يا "كريسبين" شو أسوّي معه..

"كريسبين" : انس موضوعـــــه، البلد اللي ما بتـــتأثر موازنتها بفقدان 500 مليون، مستـــحيل تستـــفيد "شلن" لو تم استرجاع الـ 500 مليون.. ارفع "الشيبس" أربحلك !!
(العرب اليوم)