facebook
twitter
Youtube
Ammon on Apple Store
Ammon on Play Store
مواعيد الطيران
مواعيد الصلاة
rss
  • اخر التحديثات
  • الأكثر مشاهدة




يوميات اردنية: طراشة وبلاط


د.سيما كلالدة
18-05-2017 12:32 PM

بيت أيمن ونوال بده شوية تزبيط
اتفقا أن ياخذ أيمن أسبوع ونوال الاسبوع التالي املين أن تكون فترة كافية لانهاء الشغل
أيمن: تفضلوا المطبخ من هون
وبدأ التكسير والخبط والغبرة، والبيت فوضى عمال طالعة، وعمال داخلة
جلس الشغيلة للغداء
قال احدهم : يا أبو عمر، الشاب هون بده يروح ساعة يجيب مواد وبرجع وأنا بطلطل عليه اتاكد من الشغل
أيمن غشيم
بس لو تصحى يا أيمن شوي
هاد الفيلم المعهود
اصحى يا أيمن
بس أيمن محترم، إبن زلم
متعود على كلام الرجال
ما دارتله
قال أيمن: ليش ما جبتوا المواد معكم ؟ ما انتوا عارفين من قبل
طبعاً الجواب المعهود : والله ما توقعنا يكون الوضع هيك ، الشبكه عندك خربانه ،احنا ما عنا مشكله
إذا بدك نكمل ونسكر فوق المواسير هادي إنت حر، بس رح تطر تكسر من أول وجديد ' ملاعين ، عارفين أنه أخر جملة جابت أجله للمسكين '
أيمن: لا أنا بدي شغل نظيف
راح الشاب والمطبخ طبعاً في حال الويل، بلاط مكسر والمواسير مكشوفه
وساعة ، ساعتين ،ثلاث ساعات
أيمن برن على المحروس و معلم المحروس ، طبعاً ما حد برد
مسكين أيمن
وهيك ضاع معظم اليوم
تاني يوم نفس الشي
شرفوا الشباب ثالث يوم ،وأيمن معصب
المعلم: معليش اعذرنا الوالد أعطاك عمره
أيمن : حصل خير
وبدأ الشغيله الشغل
ونوال طبعاً بتجيب جاهز و هي راجعة من الشغل للعيلة وللعمال، أما الشاي والقهوة فمن عند الجارة الله يخليها
في اليوم الخامس: شو شباب متى بخلص المطبخ عشان نبلط ؟
بكرا
بكرا، بكرا
شو بدنا نعمل
ولم يحضر أحد تاني يوم
أيمن عصب وما حد برد
اليوم التالي بشرفوا العمال
أيمن : شو ؟ وينكم ؟
المعلم : والله في ناس فقع البويلر عندهم ،وحرام الدنيا برد وعندهم صغار ،رحنا زبطنا الامور
طبعاً أيمن لا يقوى على الرد ، عيله، وبويلر، وبرد، وصغار ' يلا خلينا نخلص ، طبعا إجازة أيمن بتخلص بكرا
أجا دور نوال لانه أيمن راح على الشغل
نوال: كيف الامور وين وصلتوا ؟
تمام التمام
المعلم: بس اليوم رح نشتغل بشغيل واحد التاني وقعت على رجله ماكينة خرط
نوال: بس هيك الشغل رح ياخد وقت أطول
المعلم : إنت بدك شغل نظيف ولا لأ ؟
نوال: أكيد
المعلم :يالله برجع أخدك العصر
وهيك يوم في شغل ويوم في مصيبه ، ما ضل حد ما مات ، ولا بويلر ما فقع ، ولا شغيل ما انصاب
وبدل اسبوعين ، أخد بيت أيمن ونوال شهرين
خلص الشغل ، وطلعوا الشغيله، وخلص المطبخ ، والصالون وحمام الضيوف
وكل مرة بقعدوا أيمن ونوال في الصالون الجديد يشعروا بابوا المعلم وبويلر الجماعة و رجل الشغيل قاعدة معهم .





  • 1 عيسىًالمهاني 19-05-2017 | 02:24 AM

    احسنتي الوصف دكتورة . للاسف هذا هو واقع حال معظم الصنايعية السرسرية .. لكن فاتك شيئا ان المعلم يضع نغمات ادعية او قرآن على رنة خلويه .. وهي من مستلزمات النصب كي يوهمك انه ( يخاف الله ) !!!

  • 2 صلاح عبدالصمد الخمايسه 19-05-2017 | 11:18 AM

    كتبت أكثر من مره مداخله لي على المقاله مثنياً فيها على الكاتبه لتناولها مثل هذه المواضيع ولكن قبل أن أنهي الحروف ال500 المخصصه يمسح ما كتبته ، أختصر شكراً لكم وللدكتوره المبدعه وإن شاء مع مواضيع أخرى لها تماس في حياتنا اليوميه ، شكرا


تنويه
تتم مراجعة كافة التعليقات ،وتنشر في حال الموافقة عليها فقط.
ويحتفظ موقع وكالة عمون الاخبارية بحق حذف أي تعليق في أي وقت ،ولأي سبب كان،ولن ينشر أي تعليق يتضمن اساءة أوخروجا عن الموضوع المطروح ،او ان يتضمن اسماء اية شخصيات او يتناول اثارة للنعرات الطائفية والمذهبية او العنصرية آملين التقيد بمستوى راقي بالتعليقات حيث انها تعبر عن مدى تقدم وثقافة زوار موقع وكالة عمون الاخبارية علما ان التعليقات تعبر عن أصحابها فقط .
الاسم : *
البريد الالكتروني :
اظهار البريد الالكتروني
التعليق : *
بقي لك 500 حرف
رمز التحقق : تحديث الرمز
أكتب الرمز :