facebook
twitter
Youtube
Ammon on Apple Store
Ammon on Play Store
مواعيد الطيران
مواعيد الصلاة
rss





ثلاث مكالمات سريعة خلف ناقلة الدرك .. هموم عادّية ..


المهندس انس الازايدة
25-01-2018 08:57 PM

تقف الناقلة بين قريتين اردنيتين بعد مشاجرة بين أسرتين من عشيرة واحدة لسببٍ تافه لتفاهته لم يُعرف بعدُ ، و لأن الأسرتين متشابكتان مصاهرةً فإن بعض الزوجات من كل قرية ينتقلن الى بيوت اهليهن في القرية المجاورة إما طرداً او خوفاً او احتياطاً ، نزوح الزوجات استلزم انشغال الدرك مع دورية الشرطة في متابعة السيارات للتأكد من عدم تسلل المخربين بين القريتين.

بعد ان دخل الليل و سكنت الحركة بدأ أفراد الدرك الاتصال بذويهم و أحبابهم مداورةً ، انتحى الملازم المسؤول أولاً خلف الناقلة و اتصل بزوجته ثم تبعه الرقيب الخاطب و اتصل بمخطوبته ثم جاء دور الجندي العاشق و الذي اتصل بأمه لأن الاتصال بمحبوبته يتعذر في هذا الوقت.

(١) الزوج ( الملازم ) مع زوجته..
- الو
- مسيكي بالخير
- مسا الورد ، دقيتلك و بعثتلك يجي عشر مرات
- منتي عارفة مقدر أرد هذول الجماعة مجانين ، قبل سنتين واحد طخ ابن خاله
- انداري عن شغلكو دور مباريات دور ارهابيين دور هوشة حتى لو اثنين تهاوشو عزرع يجيبوكو تحجزوا بينهم !
- احمدي ربك يا مره و الله احسن من غيرنا
- الحمد لله عكل حال ، كل هالتعب و منت قادر تجيبلي غسالة اوتوماتيك بدل الجاروشة اللي عندي كسرت ايدي
- و بعدين يا سعاد ؟! قلتلك اجلي الحكي بالغسالة شهرين زمن و مو وقت تفتحي سواليف هسع ما معي وقت
- حاضر ، انخرست خلص حتى الحكي ما يطلعلي
- يزن نام ؟ ( خروج سلس و ذكي من السياق )
- لا ، هيو متزنقح يلعب بالتاب
- و سلمى ؟
- سلمى نامت و عليها حرارة و تقح من العصر
- و ليش ما حكيتيلي
- بعثتلك عالوتس و رنيتلك الف مرة
- اعطيتيها ريفانين ؟
- أعطيتها بس يمكن تحتاج كبسولات
- ما تسرحي عنها بالمسلسلات ، كل عشر دقايق حسّي الحرارة و خبريني
- طيّب ، اسمع بكره ام شاكر و آيات طالعات الصبح عالباله و قالتلهم ختام انه منزّل بضاعة جديدة و يزن محتاج أواعي كل بناطيله مخيّطة تخزي ، اروح معهن ؟
- منين قروش يا سعاد ؟! لا تدايني من أمك
- ظل من عيدياتي ١٥ ليرة و اذا احتجت أوخذ من آيات خمسة
- انداري ! بس اذا سلمى ما تحسنت لا تروحي
- ماشي حبيبي ، نايتي
- نايتي يا بنت جميلة ؟ ماشي ، نايتي و رحمة الله .

(٢) الخاطب ( الرقيب) مع مخطوبته ...

- الوووه
- يابايييه ، يسعدلي هالصوت يا زينة البنات
- يسعد قلبك يا حصتي
- شلونك يا عمري
- كويسة ، بس زعلانة منك
- كل شي ولا زعلك ، لا يكون أمي حاكية معك ؟
- لا يا حبي ، لإنك مطنشني من الظهر ، اخر مرّة بعثتلي و انا بالمحاضرة و بعدين ما تتذكرني الا تالي الليل و انت آخر ظهور عندك عالوتساب قبل ساعة و ما فكرت تبعثلي كلمة ، و بعدين شو مالها حماتي بدها تحكي معي بشو ؟ أكيد بدها نوخذ البلاط الرخيص للمطبخ و الحمامات
- يا حبيبتي حلمك علي شوي ، بدل ما تسمعيني كلمتين حلوات و انا طول النهار بالشموس مصمود مثل الجندي المجهول ماد ايدي أوقف السيارات
- يعطيك العافية بس انت لو تشوف شو ابعثلك كان شفت الكلام الحلو
- ما بعثتيلي غير كيف حالك و بعد ساعة بعثتي انك مروحة بباص الجامعة
- قلتلك ما تشوف ، بعثتلك أغنية علي بن محمد
- تعرفي اني هسه تذكرت ، كبست عليها و ما فتحت معي ، النت زبالة
- طيب اسمعها بس نخلص التلفون
- اصلاً لازم اخلص ، انا لابد ورا الناقلة قلت احكي اسمع صوتك و عالساعة ١٢ يجو يستلمو الشفت و نحكي براحتنا
- وَل عحظي انا
- شو مال حظك يا شروق
- قصدي مش قادرة احكي معك زي الناس
- لا قصدك انك اخذتي واحد دركي راتبه اربعمية و تركتي عبدالله اللي ابوه عنده محلات إسمنت و حديد
- لا و الله يا ظالم ( تبكي )
- (يندم ) خلص حبيبتي انا اسف و الله فهمتك غلط
( يناديه زميله )
- خلص شروقتي بالله عليكي لا تبكي ، الضابط ينادي عَلَي
- روح و نتفاهم بعدين عكلامك السم
- عارفك حنونة و ما يهونلك ، يالله سلام
- سلام

(٣) العاشق ( الجندي ) مع أمّه ...

- هلوو
- كيفك يمّه
- خالد ؟
- اه خالد يمّه غشمتي عن صوتي
- و الله خمنتك خالك سليمان الله يسلمه صوته مثل صوتك
- هو الله يسلمه لأنه أخوكي ؟ و انا ابنك
- انت بس بدك تماجقني ؟ حاطلي رصد عكل حرف
- ما نمتي ؟ انا قلت تِخمين نايمة
- توني صَلَّيْت لعشا ، كانت عمتك فاطمة قاعدة و اجا ابوك و حطيتلهم عشا و روحت مع حسام وصّلها
- المهم حكيتي مع أبوي مشان صوفيا ؟
- و الله يا ميمتي حكيتله بس انت عارف انه ما يتحاكى هو و ابوها من الانتخابات
- ايوه و شو حكالك ؟
- حكالي هو ما لقى غير بنت سليم الاجرب ؟
- صار اجرب سليم ؟ قبل الانتخابات كانوا بالبكم مع بعض من الصبح للمغرب من عرس فلان ل مدالة فلان و يتغدوا عندك و يتعشو عند فوزية
- يدّهْ هاي سواليف عزعل ، اصبر شهرين زمن يرجعوا لحالهم
- يمّه شهرين تطير البنت من إيدي
- وين تطير ؟! عمرها ١٨ سنة ما طلعلها ريش تطير و عندها توجيهي ما تخاف
- يمّه حظي بعرفه ، يطلع ابن خالتها ولّا يجي ابن عمتها من دبي و تعجبه
- شو هي باقية سميرة توفيق ؟ بس انت شايفها حلوة كثير لأنك تحبها و بعدين النصيب يحكم
- شو النصيب يمّه ، كيف يجي النصيب و احنا ما طلبنا ؟
- طيب اصبر شوي ما ظل حدا يجوز بناته قبل التوجيهي ، و بعدين صوفيا شاطرة و يمكن تكمل جامعة
- تكمل عندي انا بدرسها
- ضحكتني يا ولد
- انا بحكي جد و الله اذا ما أخذت صوفيا ما اتزوج ، أقولك غير اطخ حالي بالوظيفة
- يلعن ابو اهلك لا تحكي هيك ، خلص انا بحكي لخالك يوسف يقعد مع ابوك ، هو يمون عليه
- انا بدّي جاهة تطلب ولّا بدّي جاهة ل أبوي يوافق ؟ انا تعبت من أبوي و دبّيت عالدرك اخلص منه
- لا تحكي هيك عن ابوك
- و الله الدرك ارحم منه ،عالأقل هون شفتات مش زي عنده يمسكني من الفجر أزُم برابيش التفتاف عالحَدَرة و ما يعتقني للمغرب اروّح عندك ايدي مجرحات و اجري مزلطات و انام مثل القتيل ، لا تركني ادرس ولا خلاني أعيش حياتي مع جيلي و لما بطلت الارض تجيب فايدة رماني عالدرك يوخذ علي قرض ،و هسه بَدّه يزوجني عكيفه ، يلعن ابوها من عيشة
- خلص يدّه و الله غير اروح انا عند فوزية و احكيلها احنا بدنا البنت و بس الثيران يتراضو نفتح السالفة
- اه روحي بكره عليها من الصبح ، و انا بخلّي سحر تحكي لصوفيا و تعمل انه ما عندها خبر
- ماشي يا ميمتي روح ارتاح و انا أمك
- قدّها بنت محمد الراشد ، الله يرحمه ابوكي انتي شيخة بنت شيوخ ، انداري كيف أعطوكي لأبوي
- هيلمجي ابو عقلين
- يسعدك يمّه تحكيلي شو يصير معك بكره
- طيب ارتاح ما عليك ، سلام عليكم
- مع السلامة

هامش الترجمة
متزنقح : يستلقي على ظهره
كبسولات : مضاد حيوي
يدّه : حرف نداء يستخدم في الشمال و هو مرادف ل يا حنّوني و قد يكون اصله يا داده
لابد : مختبيء
تخمين : اتوقع او أخمن
الحَدَرة : الارض المنحدرة ذات التضاريس الصعبة
مدالة : بيت العزاء




  • لا يوجد تعليقات

تنويه
تتم مراجعة كافة التعليقات ،وتنشر في حال الموافقة عليها فقط.
ويحتفظ موقع وكالة عمون الاخبارية بحق حذف أي تعليق في أي وقت ،ولأي سبب كان،ولن ينشر أي تعليق يتضمن اساءة أوخروجا عن الموضوع المطروح ،او ان يتضمن اسماء اية شخصيات او يتناول اثارة للنعرات الطائفية والمذهبية او العنصرية آملين التقيد بمستوى راقي بالتعليقات حيث انها تعبر عن مدى تقدم وثقافة زوار موقع وكالة عمون الاخبارية علما ان التعليقات تعبر عن أصحابها فقط .
الاسم : *
البريد الالكتروني :
اظهار البريد الالكتروني
التعليق : *
بقي لك 500 حرف
رمز التحقق : تحديث الرمز
أكتب الرمز :