بينما كانت أم نافز في المطبخ شعرت بحركة في ساحة الدار، وبأصوات غريبة: حط هون عندك، أوعى المي، إن شا الله المطرح بوسع.. نشفت يديها على عجل وهرولت نحو (أرض الديار)* لتجد عتالين على ظهورهم شوالات وآخرين بيدهم كرتونات يرتبونها في المنطقة... فسارعت لسؤالهم: شو هاظ؟ فأجابها أحدهم هي أبو نافز عند البكم* روحي وإسأليه.

خرجت أم نافز مسرعة لتجد زوجها ينظم تفريغ البك أب، وهو يصيح: حي الشباب، يعطيهم العافية، أسرع يابا...
سألته مستهجنة: عزا شو هاظ؟ فقال: سنكسر الحصار. لم تفهم أم نافز، فقالت أي حصار يا غبرا*؟ قال وهو يرفع رأسه، حصار أبو رفقي الدكنجي* اللي بفكر بلاه رح نموت من الجوع، والله بس لولا مخافة الله لكانوا الجمارك هسا بفتشوا داره على الدخان، بس لأ، بظل أحسن منه وأصلي بردني.

لم تفهم أم نافز شيئا على ما يبدو فافترشت طرف الرصيف باب البيت بانتظار انتهاء العمال لتنفرد بأبو نافز.
ما إن انتهى العمال وشكرهم أبو نافز حتى سألته: ومن وين تكاليف هالهبة؟ إن شا الله دين؟وك هظول حقم الشئ الفلاني، شكلك بدك تفتح دكان والا سبيل؟ والا في حرب جاي ونازل تخزن؟ لمين، لمين هالمونة؟

تلقى أبو نافز سيل الأسئلة هذه بارتياح غريب، لم يعصب، ولم يرتفع صوته، بل أجاب بهدوء، هذول لكسر الحصار مثل ما حكيتلك، ردت: لا حول ولا قوة إلا بالله هو انت كاين غزة والا قطر؟

أجاب وهو مفعم بالثقة: مبارح رحت على أبو رفقي بدي بوكيت شاي، قال شو قال بطل يدين، وحسابي ثقل، فكره إذا ما اشتريتش من عنده بموت من الجوع ابن هالـ......، رحت رنيت على نافز وقلتله يبعثه ثلاثمية نيرة*، وما قصر، الصبح وصلن ورحت عسوق الجملة تبضعت هالأغراض، وسديت (الوسخ) ديناته، والله إذ زادها مع أهل الحارة لاعملها سبيل.

صمتت أم نافز لبرهة وقالت: أي نافز الله يعينه في الغربة هو مش ملحق عولادته* كمان بدو يلحق علينا، مهو تقاعدك مكفينا والله ساترها.

أجاب أبو نافز بنرفزة: تقاعد إيش؟ وين انت عايشة؟ الأسعار ولعت، والدنيا قادت نار، بطل يكفينا التقاعد أسبوع، وباقي الشهر عايش على حسنة الأولاد في الغربة، خليها لربك، وكان مش ناقصني غير هالرزل يتمنن علي.. الحق مش عليه الحق علي ركّضتله بانتخابات لجنة المخيم وخليته ينجح.. بسيطة!

قالت أم نافز: ول ول ول.. هذا أنا غايبة فيلة، بس بتعرف يا بو نافز؟ أنا ماكلة هم اللي ما إلهم سند في الغربة، ولا تقاعد حتى، هذول من وين عايشين يا غبرة؟

أجاب أبو نافز وهو يهز برأسه: توكلي على الله يا ام نافز.. في رب بتولى الجميع.

• أرض الديار: ساحة مكشوفة وسط البيت.
• البكم: شاحة صغيرة (بك أب)
• يا غبرا: كلمة للتعبير عن الاستهجان
• الدكنجي: صاحب الدكان
• ثلاثمية نيرة: 300 دينار
• ولادته: اولاده