facebook
twitter
Youtube
Ammon on Apple Store
Ammon on Play Store
مواعيد الطيران
مواعيد الصلاة
rss
  • اخر التحديثات
  • الاكثر تعليقا





فزعتكم يا النشامى .. انا منكم واليكم


ابتسام عطيات
20-10-2010 03:25 PM

الاهل..الاحبة..ادعوكم لحضور حفل افتتاح مقري الانتخابي في الساعة اللي بدكم اياها..مو مشكلة مو انتوا رح تنتخبوني؟؟..كرمال خاطركم رح افتح مقر كل دقيقة..والكنافة السخنة ..ناعمة وخشنة على مدار الساعة. والمناسف كمان .أبشروا..ليش هو كل يوم في انتخابات..ما عليكم بس تعالوا وشوفوا( بعدين ما رح تشوفوني)..
ولاد عمي قرايبي..النشامى.. رح اكون مثل ما بدكم..ما رح اخلي شيء بنفسكم وما اعمللكم اياه.. انتوا شايفين الفقر ضارب اطنابه والبطالة مو مخلية حد من شرها وعشانكم انا رح احاربهم الاثنين حتى لو بسيف دونكيشوت ..ابشروا بالوظائف حتى لو عالفئة الرابعة..حتى لو مراسلين بدائرة حكومية( مالهم المراسلين)..انتوا ما عليكم بس قدموا لي كشف باسماء العاطلين عن العمل والمتقاعدين والموظفين كمان كلكم رح تشتغلوا ..صدقوني انا كروتي جاهزة( محروقة) لما ببعثكم لفلان وعلان يدير بالهم عليكم ( اذا بيعرفوني)..رح احكي تلفونات حتى مع رئيس الحكومة ولو كان الخط مفصول بحكي منه وتسمعوا صوتي ما بردكم خائبين..ما رح اخلي من جهدي جهد بس انتخبوني..
اسمعوني..ما رح اخلي شيء بنفسكم وما اعمللكم اياه..انا بعرف بنفسكم قلاية بندورة..وبتموتوا عليها والحكومة نازلة بتصدر فيها..علشان خاطركم رح اغرقكم بالبندورة لحتى تسبحوا فيها وتزهقوا منها..من كثر ما توكلوا قلايات بندورة اللي هلأ مش طايلينها..
انا بدي فزعتكم يا نشامى ما بدي تخلوا شجرة ولا عمود ضغط عالِ او منخفض وتعلقوا يافطاتي عليه ما تخافوا اللي ينكسر بنجبره واللي بينجرق المستشفى جاهز وعلى حسابي..انتوا عظام رقبتي واكيد ما تتركوني وبتضحوا بحالكم كرمال عيوني..
قرايبي..فزعتي.. ما تفضحونا قدام اللي يسوى واللي ما يسوى.. لا تفضحونا قدام فلان ابن فلان يفوز وعشيرتكم الكبيرة ما شاء الله حولها وحواليها ما يطلع لها كرسي بالبرلمان..انتوا وصلوني للكرسي وما رح تشوفوني مرة ثانية ..والله ما برجع واطلب منكم شيء.. ما رح اتعبكم.. حتى رقم تلفوني رح اغيره حتى ما ازعجكم باتصالاتي..
وانتوا يالمعلمين عيال عشيرتي..رح اعمل احلى نقابة لعيونكم..وابشروا بالعدالة وبالديمقراطية..والمساواة على ايد ورجل..
تاكدوا ما حد رح ينفعكم غيري..فانا منكم واليكم..مرشحا للتجديد والتغيير ..ولا للشعارات.. ونعم للخدمات.. واي شيء بكم اياه..بس انتخبوني..
عظام رقبتي..فزعتي..النشامى " وعسى ان تكرهوا شيئا وهو خير لكم" انتوا طول عمركم ما تحسنوا الاختيار..فانتخبوني..ليش هي اول مرة بتصير معكم..انتخبوني وما عليكم..

ialatiat@yahoo.com




  • 1 kharabsheh 20-10-2010 | 06:11 PM

    فعلا والله هذا الواقع بس المشكله فينا احنا الشعب الاردني بنركض ورا هيك اشكال

  • 2 الصحفية نجاة الحميدات 21-10-2010 | 12:10 AM

    زميلتي وأختي العزيزة ابتسام ضحكتيني على واقعنا المرير الذي نعيشه كل مرة ولم نتعلم منه (نعيد نفس الغلطة بإنتخاب نواب يتجاهلوا طلبات شعب يعني قول دون فعل


تنويه
تتم مراجعة كافة التعليقات ،وتنشر في حال الموافقة عليها فقط.
ويحتفظ موقع وكالة عمون الاخبارية بحق حذف أي تعليق في أي وقت ،ولأي سبب كان،ولن ينشر أي تعليق يتضمن اساءة أوخروجا عن الموضوع المطروح ،او ان يتضمن اسماء اية شخصيات او يتناول اثارة للنعرات الطائفية والمذهبية او العنصرية آملين التقيد بمستوى راقي بالتعليقات حيث انها تعبر عن مدى تقدم وثقافة زوار موقع وكالة عمون الاخبارية علما ان التعليقات تعبر عن أصحابها فقط .
الاسم : *
البريد الالكتروني :
اظهار البريد الالكتروني
التعليق : *
بقي لك 500 حرف
رمز التحقق : تحديث الرمز
أكتب الرمز :