facebook
twitter
Youtube
Ammon on Apple Store
Ammon on Play Store
مواعيد الطيران
مواعيد الصلاة
rss





فوق الريح ..


احمد حسن الزعبي
04-01-2011 02:22 AM

قابلني صدفة في دائرة الأراضي، أخذ هويتي ومشى بها مسرعاً الى موظف التسجيل ..وقبل ان يكتب الموظف اسمي شاهداً في ذيل معاملة البيع، تأكد من «سحنتي» مرتين..وقع هنا!! وقعت..وهنا ..وهنا..وهنا..بعدها قبض أبو يحيى المبلغ وبارك للمشتري على مضض..ثم تابع الأخير معاملة استخراج القوشان..

سألته: خير شو اللي أجبرك تا بعت الحاكورة؟

أبو يحيى: بعيد الشرّ عنك وعن محبيك..يحيى توظّف صار له شهرين!!

أنا: مش فاهم؟!

أبو يحيى: لشقه الزمان لشقه أخت شلن وتوظّف بعمّان!!

أنا: كمان مش فاهم؟

أبو يحيى: قرمز جاي !! راتبه 230 أحسب معي: ليرتين ونص رايح وليرتين ونص جاي وليرتين سرفيس هاي سبع ليرات باليوم..بـ20 يوم دوام هاي 140 قديش بظل من الـ230 ؟ بظل تسعين شيل منهن أجار دار 90،بظل سلامتك، وكهرباء ومي 20،خلوي 5، وكاز وغاز 40، وأكل وشرب 100قديش صار ملحوق بـ 165 ليرة بالشهر.صارله شهرين يعني ملحوق بـ330 ليرة. وزي ما شفت هاظني بعت الحاكورة مشان يقدر يمشّي بالوظيفة لآخر السنة!!

أنا: طيب وأخوه عايش؟

أبو يحيى: لأ عايش هظاك عكروت، ملعون حرسي، جدع..وضعه فوق الريح !!

أنا: ليش وين بشتغل؟

أبو يحيى:..بشتغلش قاعد بالدار!

ahmedalzoubi@hotmail.com

(الرأي)




  • 1 ياسلام 04-01-2011 | 10:13 AM

    والله يااستاذ احمد انو هل كلام على الوجع .

  • 2 هوك 04-01-2011 | 10:39 AM

    انا الي اخوان اثنين جامعيين ووضعهم فوق الريح!!!والظاهر انه كلنا وضعنا فوق الريح

  • 3 معالي الوزير 04-01-2011 | 11:28 AM

    واقعي يا زعبي...!

  • 4 ابو خالد 04-01-2011 | 01:02 PM

    ابدعت

  • 5 من البلقاء 04-01-2011 | 01:05 PM

    تعليق كثير حلو وواقعي يعطيك العافية

  • 6 اشكرك 04-01-2011 | 04:31 PM

    شكرا استاذ احمد والله من الواقع

  • 7 اردني مغترب 04-01-2011 | 05:31 PM

    استاذ احمد اشلون وضعك

  • 8 معجب 04-01-2011 | 06:19 PM

    يا أستاذ احمد كل مقالاتك تعكس واقع حياتنا 100%.

  • 9 صريحي 04-01-2011 | 07:41 PM

    بالظاهر انه الشباب في الاردن وضعهافوق الريح


تنويه
تتم مراجعة كافة التعليقات ،وتنشر في حال الموافقة عليها فقط.
ويحتفظ موقع وكالة عمون الاخبارية بحق حذف أي تعليق في أي وقت ،ولأي سبب كان،ولن ينشر أي تعليق يتضمن اساءة أوخروجا عن الموضوع المطروح ،او ان يتضمن اسماء اية شخصيات او يتناول اثارة للنعرات الطائفية والمذهبية او العنصرية آملين التقيد بمستوى راقي بالتعليقات حيث انها تعبر عن مدى تقدم وثقافة زوار موقع وكالة عمون الاخبارية علما ان التعليقات تعبر عن أصحابها فقط .
الاسم : *
البريد الالكتروني :
اظهار البريد الالكتروني
التعليق : *
بقي لك 500 حرف
رمز التحقق : تحديث الرمز
أكتب الرمز :