بدّكْ تعرف فوائد إنك تكون ( مسهول ) مع غيرك ؛ مش لحالك ..؟؟ قد تستغرب أن للإسهال فوائد ..بس أنا عن جد أحكي ..!! فمن خلال رصدي لمـف خرة الإسهال في منشية بني حسن ..خرجتُ لكم بأكمِّن فائدة ..وحتى نحصر الحكي ؛ هنّ خمس فوائد وإللي يلاقي غيرهن يجيب وما يخاف؛ أمّنْ إيش ..؟؟ طقع و طقع الطقع كمان ..!! وهسّة تعالوا نحكي فيهن أحسن من القعدة البطّالة :-
1 ) في حالة الإسهال الجماعي تستطيع استبدال المقولة المأثورة ( الموت مع الجماعة رحمة ) بمقولة ( الإسهال مع الجماعة رحمة ) ..!! وطبعاً لو خيّروا أي بني آدم بين الإسهال و الموت ؛ سيختار على الفور الإسهال و أبو الإسهال ..!!
2 ) الإسهال الجماعي يكسر حاجز الخجل ..لأنو لو كنت لحالك المسهول ؛ أكيد رح تستحي تقول معي ( إسهال ) ؛ أمّا هسّة وإنت مع ربعك وأهلك تقولها بالفم المليان و تقعِّد الكلمة تقعيد وتعلّي صوتك ولا هامّك إشي : معي إسهااااااااااااال يا جماعة الخير..!!
3 ) ستحس بأنك لست الوحيد إللي وزنه خف كثيراً ..طبعاً خف ليس نتيجة أي شيء سوى إنك سوف تقضي طول فترة الإسهال وإنت لابس خفيف من تحت ؛ استعداداً لأي جولة ..مما يعطيك شعوراً بالخفّة بس مع عدم راحة البال ..إلا إنك سترتاح أكثر حين تعلم إنك لست وحدك بل هم كثيرُ ..!!
4 ) إن الاشتراك بالإسهال الجماعي ؛ يجعلك شخص مهم و مسلط عليك الإعلام ..وإذا شدّيت حالك بالإسهال شوية وشربت ( مَيّة ) أكثر ..ستكون المرشح الأقوى للاشتراك ببرنامج ( سوبر إسهال ) ..علماً أن هذا البرنامج لا يخضع لتصويت الجمهور ..بل لعدد طلعاتك عَ الحمّام ..!!
5 ) الإسهال الجماعي سيخضعك لأول مرّة في حياة إللي خلّفوك إلى مراقبة الحكومة الحثيثة ..تصير مهتمة فيك وبأكلك وبشربك..بطلعاتك وبنزلاتك ..وتكون خايفة لأول مرة منك ..من ردة فعلك من نرفزتك ..يعني اشطح وانطح يا سيدي ..إنت بتخوِّف بلد بحالها ..وهذا ليس لأنك مواطن ..بل لأنك تمتلك لأول مرّة ( إسهال ) مش طبيعي ..إسهال تطير فيه رقاب ..إسهال ..كُتب عليه ذات تلوّث :- تاريخ الصنع ..ولغاية الآن يبحثون عن تاريخ انتهاء الصلاحية ..!!

abo_baghdad@yahoo.com