اليوم والأردن بيحتفل بالعام الثمانين للاستقبال، القلوب كلها بتنبض بحب هذا البلد العظيم، ثمانون عاما مرت، مسيرتنا مستمرة بالخير والعطاء بفضل همة أهلنا وعزيمتهم اللي ما بتلين وبفضل قيادتنا الهاشمية الحكيمة اللي كانت دايماً صمام الأمان لنا.

لما نرجع بالذاكرة لليوم اللي تأسس فيه استقلالنا بنشوف كيف الأجداد بنوا هذا الوطن من الصفر وبنشوف كيف الأجيال استلمت الراية جيل ورا جيل بكل أمانة وفخر.

الاستقلال بالنسبة للأردنيين هو أسلوب حياة وهو العهد والوعد اللي بنعيشه كل يوم واحنا بنسعى لتطوير بلدنا وحمايتها، كل شبر في الأردن، من شماله الأخضر لجنوبه الشامخ ومن عمان الحبيبة لباديتنا العزيزة وأغوارنا المعطاة بيحكي قصة إنسان أردني مكافح ومحب لأرضه، هذا الإنسان اللي أثبت دايماً إن الإرادة القوية والمحبة الصادقة بتقدر تحقق المستحيل وتتجاوز كل الصعوبات والمحن.

واحنا اليوم بندخل مرحلة جديدة من عمر جيلنا، بنطلع للمستقبل بكل تفاؤل وأمل. بنمشي بثقة نحو التغيير والتطوير وبندعم شبابنا وبناتنا عشان يكملوا مسيرة البناء، وبنحافظ على هويتنا ومبادئنا العروبية الأصيلة وبنضل السند الحقيقي لقضايا أمتنا وللمقدسات.

في هذا اليوم الجميل بنوجه تحية حب وتقدير لكل يد زرعت وبنت ولكل نشمي ونشمية بالجيش والأجهزة الأمنية سهرانين على حمايتنا، ولكل مواطن مخلص بعمله عشان يرفع اسم الأردن فوق، الله يحمي الأردن ويديم علينا الأمن والأمان تحت ظل جلالة الملك عبدالله الثاني وولي عهده الأمين وكل عام والوطن وأهله بألف خير.