نحنُ « الشعب»، عادة ما «نتشاطر» على الحكومة ( أية حكومة). ونتّهمها «ع الفاضي وع المليان». و»حرام» الحكومة «ساكتة»،رغم إنها « متينة « و»قويّة» مثل « سِلفة» صاحبتي.

تعالوا، «نقلب» الموضوع،و «نتخيّل» الحكومة تنتقد « الشعب» الذي هو مجموعة من « الكائنات» الاليفة وغير الأليفة.

وانا هنا، وبحكم « انشغالي بالفن»، سوف «أتقمّص» دور « الحكومة» و»أتخيّل» حالي أتحدث «بلسانها» مع الاحترام لمعالي الناطق الرسمي:

* عملنالكم ارصفة.. و بتمشوا بنصّ الشارع.

* بتكبوا زبالتكم في أي مكان بالليل و بالنهار.. بتلاقوها نظيفة.

* فتحنا لكم مدارس ونصّكم «طناجر» و «الواحد بخلّص توجيهي و ما بعرف يكتب اسمه».

* انتم من احسن الشعوب التي تكتب شيكات.. بدون رصيد . ومع ذلك «بتحط الحق ع الحكومة»!

* ما عندكم مبدأ ...رايح مع الرايح و جاي مع الجاي.

* شعب «مشكلجي».. و كم قتيل راح بسبب نظره بالغلط ؟ او في مباراة كرة قدم؟

* في الانتخابات، بتبيعوا أصواتكم بعشرة دنانير و بتجيبوا برلمان «على مقاسكم» و بالآخر بتسبوا «علينا» وعليهم.

* تدّعون انكم «مفلسين» و»كلكم راكبين سيارات فاخرة» ... وبتحضروا حفلات وتدفعوا مئات الدنانير.

* شعب «دموي» بيّطخ بالأفراح وبتموت ناس بالاعراس وبنتائج التوجيهي ولما الواحد «يطهّر « ابنه، و بتتزوجوا على «أغاني الحرب» ... خلينا نشوفكم وقت الحرب.

* شاطرين بالإشاعات و بتكذبوا الكذبة و بتصدقوها .( ما حبيتها منكم ).

* بتسبوا عالاجانب وبتقولو عنهم «كُفّار «. وما بتصدقوا ودولة غربيّة تفيّزلكم ... بتروحوا وما بترجعوا.

* الزراعة صارت بالنسبة الكم «عيب» حتى بارت الارض و صارت غير صالحه . للدقّة « الارض» زعلانة منكم.

* بالتجارة.. بتفضلوا « بضاعة « الصين اللي مش أصلية. و بدكم الرخيص يعيش.. للابد .

* بنتقدوا « الوزراء» وكلكم بدكم تصيروا مسؤولين و «وزرا».

* من كشرتكم.. هربوا السياح .

* بتعملكم الحكومة مهرجان في جرش ب 15 دينار التذكرة .. وبتروحوا تحضروا عمرو دياب بالعقبة وبتدفعوا 300 دينار ..

***
بيكفّي والاّ أكمّل..؟

فكركم « الحكومة» عاجبها اللي قلته ؟

.. ما ظنّيت !!