وأنا بقرأ خبر الطفلة اللي قُتلت على إيد أبوها وأخوها... كنت أفكر: أي مجتمع هذا اللي صار يحتاج كل يوم يفيق على جريمة أبشع من اللي قبلها؟
طفلة... المفروض حضن أبوها يكون أأمن مكان إلها. وأخوها... المفروض يكون سندها. لكن انتهى بها الأمر ضحية داخل بيتها.

هاي هي القضايا اللي لازم تشغلنا.
هاي هي الملفات اللي بدها تشريعات أقوى، وحماية أكبر للأطفال، وعقوبات رادعة، ونقاش حقيقي عن العنف والمخدرات والتفكك الأسري وكل الأسباب اللي أوصلتنا لهون.

لكن للأسف...
إحنا منشغلين اليوم بطول الشورت!
عن جد؟
بينما أطفال بيموتوا، ومخدرات بتنهش شبابنا، وجرائم أسرية عم بتزيد، واستغلال للأطفال، وقضايا اجتماعية بتخوف كل أب وأم...
صار همّنا إذا الشورت فوق الركبة أو تحتها؟
أنا مش ضد الذوق العام.
ولا ضد إنه يكون في تعليمات تحكم اللباس في أماكن معينة.
واصلا مين اللي اله الحق يقرر شو محتشم وشو حدود الذوق العام حتى اصلا ينطلب تقييد حرية اللبس..
لكن يا سادة...
ترتيب الأولويات هو اللي بصنع الفرق بين مجلس يناقش شكل المجتمع... ومجلس يحاول ينقذ المجتمع.
الناس ما انتخبتكم حتى تراقبوا خزائن ملابس المواطنين...
انتخبتكم حتى تراقبوا القوانين اللي بتحمي أرواحهم. لأن الطفلة اللي آنقتلت اليوم... ما كان رح ينقذه منع الشورت.
كان يمكن تنقذه منظومة حماية أقوى، وتشريعات أكثر فاعلية، ورقابة أشد، ونقاش جاد عن القضايا اللي عم تنخر مجتمعنا.

هزلت...
لما تصبح قطعة قماش قضية وطنية عاجلة... بينما دم طفلة لا يجد المساحة نفسها من النقاش والتشريع والاهتمام.
وهون السؤال الحقيقي:
شو أولويتنا... ملابس الناس؟
وإلا حياة الناس؟