اسمحوا لي ان اكتب باللغة المحكية :

عم بشوف انه هدا الموضوع مطنطن الدنيا شوي
بس بدي احكي عن مفهومي و سردي لقصة هالوطن
هذة الدوله اللي نشأت قبل اكثر ١٠٠ سنه عبر عقد اجتماعي بين الملك الهاشمي واهل البلد و سيبقى هذا العقد باذن الله
يعني هاي البلد اللي صارت وكبرت فيها ثوابت ما بنقدر نتخيل هالبلد من غيرها
يعني هاي البلد مش ممكن تتخيلها بدون صوره الملك عبد الله الاول و دستور الملك طلال وصوت سيدنا ابو عبدالله وضحكة الأمير حسن و تعابير الملك عبدالله الثاني سواء بالفرح او الغضب او وجه الامير حسين بن عبد الله وكله امل
يعني هل حدا بتخيل الاردن بدون النادي الفيصلي اللي نشا قبل ٩٥ سنه و صار رمز
هل حدا بتخيل البلد بدون البنك الاهلي الأردني اللي نشأ قبل ٧١ سنه و بعده موجود و كل واحد فينا هو او ابوه او جده له او كان عنده حساب بالبنك الاهلي
هل هناك شخص ما في حدا من عيلته ما اشترى ذهب يوم ما أتزوج من ( سكجها او الشامي او امسيح )
هل ممكن حدا منا ماشاف شعار مصفاه البترول ومش فاهم شو الشعار الابيض والأخضر واللي جوا بالأحمر … هي نجمه … هي دمعة او قطره … المهم معلقه براسنا كلنا
حدا بالبلد ما بيعرف مدرسه المطران والاهليه للبنات و الكليه الاسلاميه والراهبات الورديه والناصره والفرير والتراسنطه
في ناس و عائلات حطت مدماك بسردية هالبلد بكل مجال
في السياسة- وبكل تناقضاتها - هل هاي البلد بتقدر تكون هيك إذا ما كان عندنا توفيق ابو الهدى وفوزي الملقي و هزاع المجالي وسليمان النابلسي وشفيق ارشيدات وسمير الرفاعي وسعيد المفتي ووصفي وعباس ميرزا وعبد الحليم النمر وصالح المعشر وحكمت المصري و يعقوب زيادين ومنيف الرزاز وشاهر ابو شحوت ووصفي التل وعاكف الفايز وبهجت التلهوني و محمد رسول الكيلاني ومضر بدران واحمد عبيدات و سليمان طوقان وابراهيم هاشم وزيد الرفاعي و عبد الهادي المجالي وطاهر المصري وسليمان عرار و عبد الرؤوف الروابده و عبدالكريم الدغمي وليث شبيلات وصالح العرموطي و معروف البخيت ؟
من عسكر جيشنا اللي ما رح ننساهم عبدالله التل و حابس المجالي و مشهور حديثه الجازي وخالد هجهوج وفاضل علي السرحان وابو وندي بطل مدفعيه صياغه و فتحي ابو طالب والشريف زيد .
بالإعلام حدا ممكن ينسى الحاج مازن القبج و رافع شاهين و محمد جميل عبد القادر و ابراهيم شهزاده وابراهيم السمان و غالب الحديدي وابراهيم الربضي و نبيل المشيني وربيع شهاب و كلنا كل يوم نشوفهم على التلفزيون
هاي البلد بالاقتصاد بتكون هيك بدون دار بدير( اهل الكهربا والتامين و الكليه الاسلاميه ) ودار الطباع ( اهل الوكالات ) ودار الكسيح ( اهل الحلاوه والطحينه ) و عبدة نقاوه و الحاج عيسى مراد او واصف عازر
حدا بتخيل اقتصاد البلد بدون دار شومان او المعشر او السلفيتي او سختيان او ايليا نقل
هاي البلد حدا بتخليها بدون مطعم جبري وعطا علي و فول وحمص هاشم و كنافه حبيبه وبيتزا ميلانو و شاورما ريم اللحمه و شاورما الضيعه للدجاج ….هدول اللي حطوا المعيار لأكلنا
حدا فينا كلنا بتخيل البلد دون جريدة (الرأي ) وكلمة الرأي تتوسط خريطة الوطن العربي و تدخل لتقرأ مقالات فهد الفانك و طارق مصاروه و فخري قعوار و تستمع بكاريكاتير عماد حجاج او مقال احمد حسن الزعبي لاحقا
هاي البلد اللي حطت علامه جوده لكل منطقة : زيت الكفارات ، لبنه جرش ، سمن بلقاوي ، جميد كركي ، سماق عجلون ، جبنه نابلسيه ، زعتر الضفة، بطيخ جنين ، عنب الخليل
هاي البلد اللي فيها علامات تجاريه خاصه فيها مثل (فاين ) و ( علكة شعراوي )ما حدا بيفهمها خارج البلد
اي حدا بتحكيلوا ( عميد او ازحيمان ) بيفهم انك بتحكي عن قهوة واي حدا بتحكيلو ( كباتيلو ) بيعرف انك بتحكي عن عطار واي حدا بيسمع (شاهين ) او ( الشعب ) انت قصدك محمص .
حدا بتخيل هالبلد بدون خلطه اهل المدن والفلاحين والبدو والشوام و النوابلسه و الشركس والشيشان والأرمن والأكراد و اهل فلسطين اللي اجوا على البلد ٤٨ و ٦٧
وما حكيت عن وجوه القانون والقضاء ولا الطب ولا الهندسه ولا الغناء والموسيقى ولا عشرات القطاعات الاخرى
اللي بده يحكي و يفتي عن السردية بقترح عليه ياخد اللي ذكرتهم ويجمعهم مع بعض ويخلطهم و يعصرهم و يطلع منهم سرديه بتحكي عن هالبلد وكيف طلعت من رحم المعاناه و ظلت قويه باهلها وناسها
وبالاخر بدي اكتب الاية الكريمه
(رب اجعل هذا بلدا آمنا وارزق أهله من الثمرات)
صدق الله العظيم