الها مفعول حلو على قلبي وبتخليني فجاة احس الدنيا حلوة.. كل ما بتطلع على الراديو في السيارة صدفة بحس بانبعاث مفاجئ من الطاقة ..

وكمان بحبّ " إنت لسه بتسألي" لأنها بتذكرني كيف كنت صغيرة والعالم كان أكبر ولونه أجمل ..

بحبّ هاني شاكر الراقي ..ابن الناس..بحبّ كيف كان ضد الإسفاف والأغاني الهابطة ..

بحبّ الرقيّ الي كان يشعّ منه على الشاشة .. وبحبّ هاني الأب اللي بكّاني بس فقد بنته ..

بحبّ كيف " أصاحب مين " بتعمل جو حلو في بيتنا كل ما نشغلها حتى لو اني كل مرة بخبرُهم إنها بتخليني شوي أحزن ..

وبحبّ كيف هاني بذكرني بطفولة في مكان كان فيه كل خوالي وخالاتي وتيتى وجدو تحت سقف واحد ..في مكان واحد اسمه " بيت تيتى وجدو " في الكويت ..

ورغم انه " عليّ الضحكاية" طلعت وانا بيبي بس الها في ذاكرتي السحيقة مكان فيه فرح وورد وبراءة ..

بحبّ هاني شاكر وحزينة من كل قلبي انه مات.. بحبّه وبحسّ اني كبرت كل ما غيّب الموت شخص اله مكان في ذكرياتي ..