فور دخوله الصف، نهض الطلبة فورا تبجيلا واحتراما لمعلم الرياضة في المدرسة الحكومية "عقيل".. ورددوا بصوت واحد: قيام...

عقيل الذي كان غاضبا من خلاف عائلي اعتيادي، رد عليهم بأدب جم: اقعدوا يا بهايم..لويش لابسين رياضة؟..ليكون مفكرين حالكم منتخب البرازيل مثلا!..

شو يا "افكح" ما انت رجليك الثنتين "شمال" وبدك تلعب فطبول..امشي بسرعة جيب "القشاطة"، وانت يا "هامل الزلام" مثل البرق هات "السطل"، واشطفوا الدرج، بدي اياه يلمع لمع!..
ليش بتضحك يا "مدقدق"..مبسوط على خيبتك..روح بسرعة جيب المجرود والمكنسه..ما انت
مستقبلك تلبس افرهول "اورانج" بالأمانة!..

ناسي حالك يا "طنجرة" ناتع رأسك بس للحلاقة، ومابتعرف اذا انه الديك ببيض وإلا بيولد!..هاظا اللي شاطر فيه..فيصلي.. وحدات!.

تعال جاي يا "ابوالحيايا" مثل البرق روح عند "ابوعلي الخضرجي"، قول له وين اغراض "الاستاذ"!..

شو يا "اشعب ابوكرش" في اشي بضحك!..والا بتضحك على خيبتك، كل ثلاث سنيين بصف، ومو شاطر غير بالأكل..بسرعة على مكتب عطوفة المدير، انتع السجادة واغسلها وانشرها على السطح، ودير بالك تخلص بكيت "السيرف" كله!..وحط فوقها حجار احسن ماتوقع على رأس ابوخالد "بياع السحلب" مثل هذيك المره!..

"زنغو" و"رنغو" ياشاطرين..بتصور فاهمين شغلكم..ياعيني عليكم..بس لاتنسوا تمسحوا الطنبون، والجنطات، وتلمعوا القزاز الامامي والخلفي..ونمرة السيارة كمان!.

سد حلقك يا "أحول"..بلا رياضة.. بلا زفت..ليكون مفكر حالك "جمال ابوعابد" واحنا معناش خبر!..

في تلك الاثناء وبعد ان طفح الكيل، انهال احد الطلبة ويدعى "الشصي" بالضرب المبرح على المعلم "عقيل" فأرداه قتيلا..مع الاعتذار من امير الشعراء احمد شوقي عندما قال: كاد المعلم ان يكون "قتيلا"!...
Kreshan35@yahoo.com