قبل قليل بعثت لي احدى الصديقات رسالة على الانبوكس بتقول لي فيها انا شفت معارضين كثير بس بعمري ما شفت معارض بحب بلده زي ما انت بتحب الاردن ، ممكن تحكي لي سر عشقك ل الاردن ؟

لم اجب عليها و لكنني احب ان احكي لكم سر عشقي للاردن من قصة صارت معي قبل سنتين ، معلش تحملوني سأرويها ب العامية :

قبل سنتين زرت الاردن ، في مطار امريكا اكتشفت اني نسيت جواز سفري الاردني في البيت ، طبعا ما كان عندي وقت ارجع و اجيبه لانه المطار بعيد عن بيتي ساعتين ، المهم دخلت الاردن بجوازي الامريكي و اعطوني اقامة ل شهر ، اطريت و بسب احتضار امي انا ابقى في الاردن خمسة اشهر يعني تقريبا 123 يوم زيادة عن الاقامة الممنوحة.

في طريق العودة من الاردن ل امريكا و عند ضابط الهجرة (الجوازات) كان يجلس هناك شاب من عائلة(المناصير) ، اخبرني انه علي ان ادفع 123 دينار غرامة تأخير ، قلت له : لا مانع لدي، حين مددت له بطاقة الفيزا ، رفض ان يأخذها و قال لي :هاي بلدك و من حقك تقعد فيها زي ما بدك و لن تدفع اي قرش ، لم يتصرف على كيفه ، ذهب و شرح الموضوع ل الشخص المسؤول عنه و تم تزويدهم برقمي الوطني الاردني و تم فحص ملفي عبر الكمبيوتر ، ووقع المسؤول قرار اعفائي من الغرامة ،بعد ان انهى الاجراءات (كنت حينها قلقا ان يندم على ما فعله معي بعد ان يطلع على سيرتي في جهاز الكمبيوتر الموجود امامه لانه عندي ملاحظات في ملفي الموجود لدى الاجهزة الامنية تؤخر سفري دائما بسبب كتاباتي) ، قال لي : هي اول قضية خلصنا منها يا ابو الكساسبة خلينا نشوف القضية الثانية ،فوجئت بما فعل ، اخذ مني المناصير جوازي و طلب مني بكل تهذيب ان ارافقه ل مكتب المخابرات في مطار عمان ، بعد دقائق عاد الي و اعطاني الجواز و قال لي : توصل ل عيالك في امريكا ب السلامة.

هاي هي بلدنا ، بلد الطيبة ، بلد الاخلاص ، بلد اللي بخافوا على وطنهم .