المحامي سليمان النابلسي يناجي جده في ذكراه
16-10-2025 01:32 PM
امس الذكرى 49 لوفاة جدي سليمان النابلسي
وفي هذا اليوم بدي اتذكر دريد لحام وهو يتحدث مع والده بمسرحية (كاسك يا وطن ) واتحدث معاك…
بخصوص العيلة الصغيرة …عيلتك ….احنا الحمدلله كويسين عايشين بكرامتنا ولسه في ناس بتحبنا و بتحترمنا لأننا أحفادك
بخصوص الاردن … الحمدلله الوطن بخير على الرغم من الصعوبات و الشوك اللي حوالينا
بخصوص السياسه والدستور والأحزاب
عندنا صار احزاب (حبطرش ) ما بتصدق قديش … يعني قد اميركا على عشرين مره
وبعدين صارت الدولة تحب الاحزاب و تعطيها مصاري
وكل واحد زهقان اما بسجل حزب او ينضم لحزب …
كل حزب عنده مجلس حكماء وأمانة عامه ولجنة مركزية ومحكمة حزبيه وكوادر
بس اسألهم مين انتوا او شو المبادي والأفكار صدقني ما حدا عارف
بعدين لازم يصير عنا دائره مراقبه الاحزاب زي دائره مراقبه الشركات علشان عمليات دمج واستحواذ الاحزاب اللي شغاله هالايام
والقيادات عادي مثل كرة قدم المحترفين بتنقلوا من حزب لحزب ما بتعرف ليش دخل وليش طلع و شو الفرق بينهم بس يمكن لون شعار الحزب احلى او اكراماً لل ( السبونسر ) -بالعربي -للي فاتح الدكانه
وصارت الاحزاب ضروره بطلت الاحزاب الهدامة
وعندنا مجلس نواب وأعضاء منتخبين وقانون انتخاب عصري و اعضاء شباب وكوتا نسائية
و عندنا انتخابات رئاسة مجلس نواب وصراع داخلي بين الاحزاب وصراع حزبي و بالاخر ما حدا عارف مين اللي رح (يتعين ) .
وعندنا حكومه (لطيفة جدا ) -يمكن هالتعبير ما كان على وقتك - بس معناه شباب لزيزين وكويسين.
بحاولوا و يجتهدوا بس مش عارف شو الغلط او من وين الغلط.
بس والله الجماعه بتجتهد والله يوفقهم و يكون عندهم الولاية العامه ، مع عدم معرفتي بمعيار ( الولايه العامه ) اللي كان تقرير كافه امور الدوله الداخليه والخارجيه واللي انحدر واصبحت في بعض المراحل تقرير ايام عطله عيد الاضحى
بخصوص قضيتنا كلنا - قضيه فلسطين - الحمدلله انك مش عايش تشوف الضفه والمستوطنات و عباس واللي صار باهل غزه و تشوف ترامب و السيسي والمسرحيه تاعت اول امبارح
والله يا جدي لو شفت منظر جلالة الملك عبدالله بشرم الشيخ وكيف -الله يحميه- كبران 15 سنه من امبارح لليوم .
قسما بالله حسيته مش طايق يطلع بس ظروف البلد ما بتستحمل يغيب
يا جدي
واذا آخر سوال رح تسألني شو ناقصكم
رح اجاوب نفس جواب دريد لحام باخر المكالمه
بس ناقصنا شوية كرامة
الرد على تعليق