فاجأني ابني ( وطن ) بسؤاله : بابا يعني إيش وزير ..؟ قلتُ له : يعني إشي كبير ..فقال : مش فاهم عليك ..فقلتُ : الوزير يا بابا إشي زينا و مش زينا ..يأكل مثلنا وأكله مش مثلنا ..له لسان مثل لساني و لسانك بس حكياتو – يقطع قلبي – مش زي حكياتي و حكياتك ..عيونه مثل عيوني و عيونك ..بس زاوية الرؤية عنده دائما حادة ..حتى الأذنين يا بابا من حيث الشكل هما مثل أُذني و أذنيك ..بس الكلام الذي يسمعه هو غير ..أنت تسمع : اقعد انطم اخرس يلعن تفو سد نيعك ..أما هو فلا يسمع إلا : معاليك (تصفيق) ..الله يخليك (تصفيق) ..لا يحرمنا منك (تصفيق) ..انت الرجل المناسب (تصفيق) ..لولاك الحكومة ما إلها طعم (تصفيق)..

كنتُ على سجيتي و أنا أضرب الأمثلة لابني ..وما انتبهتُ و إليه وهو فاتح فمه على الآخر و انتظرني حتى أخذتُ فاصلاً للاستراحة حتى هب و قال لي : إنت بتتخوث ؛ و الله بتتخوث ..مش فاهم إيش بتحكي ..!! نسيتُ أن ولدي عمره أربع سنوات و هو بحاجة لعشرين عاماً ليفهم ما أقول ..!!

لكنه فاجأني ثانية عندما صرّح لي و هو يتجه للباب : بابا ..أنا بعرف إيش يعني وزير ..؟ يعني زي الزلمة إللي في الدكانة ..بس اللي في الدكانة بنعطيه مصاري عشان يعطينا شيبس و إشي زاكي ..و الوزير هو اللي يعطينا الشيبس و إلاشي الزاكي و يعطينا كمان مصاري ..!!

خليك يا ولدي كما أنت ..لا تغيّر نظرتك عن الوزير ..إنت مش أهبل و بس ..إنت أهبل من أبوك ..و عقاباً لك ..ما فيش مصاري لمدة أسبوع ..خليني أشوف الوزير تبعك كيف بدو يجيك و يعطيك مصاري و شيبس و إشي زاكي ..؟؟!!

هاي آخرة الأولاد لما يتدخلوا في السياسة ..!



Abo_watan@yahoo.com
الدستور