بالَكْ ترجع الوزارة ..؟؟ لأ ..ما ترجع ..!! بالَكْ مش رجعتها أحسن ..؟؟ أحسن وإلاّ مش أحسن شغلة ( تخرخِشْ ) المُخْ ..!! جدل طالع نازل ..فجأة صرنا كمن يبحث عن بوصلة ضاعت وسط مليون طن من أوراق الصحف ..!! ما دامت الصحف اليومية وغيرها فالتة من سطوة العهد العرفي ..وما دامت تلفونات آخر الليل صارت (( للعشّاق والحَبّيْبة والمراهقين )) ..فما الدّاعي إذَنْ لعودة وزارة الإعلام ؟؟!! أمْ كانت ( حردانة )) ورجعت ؟؟ و طيّبْ إللي ( حردان ) مش لازم يظل ( حردان ) لَحَدْ ما يبوسوه من هون وهون و ( يوخذوا بخاطرو ) و ( يرظّوه ) ..؟؟ وإلاّ الحردان صار هالأيّام يزعل على كيفو و يبطِّلْ زعلان على كيفو كمان ..؟؟ فعلاً شغلة طَرْمة..!!
العودة لوزارة الإعلام فيها ( إنّ ) ..وإنّات و لنّات ...!! ومهما جاء التبرير و تحت أي ذريعة لن تكون مُقنعة ؛ إلاّ إذا كان هناك من يسعى لـ ( الاستثمار ) من عودة الوزارة ..!! مهو إللي مش لاقيلو تخريجة يجيب من وراها ( بلاوي زرقا ) صار يدوِّرْ على أي شيء يعيق تقدّم الوطن و يستثمر من وراه ..!!
لن تكون عودة الوزارة مُبرّرة إلاّ في أربع حالات فقط ..لا خامس لها ..وإللي مش عاجبه فلْيُراجع قدرته العدديّة :-
أوّلاً : إذا كانت ( غايبة و جايبة ) ..أمّا ( غايبة و شايبة ) فلا يجوز...ثانياً : إذا كانت ( واقفة و لاقفة ) أمّا إذا كانت ( واقفة و ناتفة ) فلن نسمح ..ثالثاً : إذا كانت ( مارقة و فارقة ) أمّا إذا كانت ( مارقة و سارقة ) ربنا رَحْ يشِلْ إيْدها ..رابعاً : إذا كانت ( فايعة و ضايعة ) أمّا إذا كانت ( فايعة و بايعة ) فلن نمنحها حسن السلوك...!!
يا اخوان ..يا شيوعيّين ..يا رفاق ..كُلْ ما نقوم ، تْقَعْدونا ...وبعدين ..؟؟!! وكُلْ ما نُقْعُدْ تْقَومونا ...وبعدينين ..؟؟!! ..نريد أن نقوم بشكل صحيح ..أو ( نُقْعُدْ) بشكل صحيح أيضاً ..تعبنا من الوقفة بالغلط والرجعة بالغلط ..وإلاّ بحكي غلط ؟؟ جيّة الوزارة غلط .. وروحتها غلط ..وحكينا معكم غلط ..ومين أنا حتّى أشرِّطْ و أمرِّطْ ..؟؟ أنا خَلْقةْ واحد وجوده أصلاً غلط ..!!