أكيد شُفتْ إعدام صدّام..وأكيد حسّيتْ بحكّة شهامة و زغزغة كبرياء..أكيد هبّتْ عليك طقوس رائعة للموت ؛ وحاب تعيشها..!! إلَكْ نَفْسْ تموت هيك موتة ..صَحْ ..؟؟ يعني ؛ ما يهفّ على بالك ولا يجول بخاطرك إنّكْ تقابل وجه ربّكْ وإنت الموت خايف منّكْ ؛ مِشْ إنت إللي خايف منه ..؟؟ أكيد نفسك وأكثر ..وأكيد من يوم ما شُفتْ صدّام ( يتعربش ) عَ حبل المشنقة وإنت شايف الموت ولا إشيْ..وحاب تصير زي صدّام ..وحاب تتصوّر بفيديو أكيد ..وحاب كل الفضائيات من هسّة تبلِّشْ تتعاقد معك على بثّ اللقطة ؛ لأنك لازم ( إتْأمِّنْ ) إللي وراك بشوية قروش ..؟؟ طيّبْ ولا يهمِّكْ ؛ ولا يكون عندك فِكِرْ..عندي طريقة إلَكْ ما تْخُرْ المَيّة ؛ سواء المَيّة العاديّة المالحة إللي نشربها كل يوم ؛ أو مَيّة الصحّة إللي نشوفها قُدّام الناس ( الهَلُمّا ) ؛ أو حتى مَيّة ( النار ) إللي تنحط في بطارية السيارة ما غيرها ..!! المهم يا حبيبي ؛ رُدْ عليّ وإعدامك على إيدي ..بس مِشْ بيوم عيد ( لأنو العيد الجاي مطوِّلْ كثير ) ؛ إلا إذا كان عيد ميلادك ؛ فما يْخَالِفْ..!!
والآن ؛ خُطتي إليك حتى تصير زي صدّام ..وعلى فِكرة ؛ خطتي بسيطة جدا جدا وسهلة التنفيذ لأنها بتناول اليد وكل يوم ممكن تصير ... اشتري جهاز خلوي ( أبو كاميرا ) و ارسم خطتكْ على إنَّكْ تصل للعراق و تتصل بإحدى الجماعات ( إللي بالي بالك ) ..وأقنعهم إذا أعدموك بطريقة إللي أعدموا فيها صدّام ؛ رَحْ ييجي واحد من طرفك عند استلام جثتك ليعطيهم ( مبلغ معين ) مقابل تسليم جثتك إليه وتسليم الخلوي أبو كاميرا إللي من المفروض يكونوا صوروك فيه وإنت تنعدم بـِ ( مزاج ) حسب اتفاقك معهم ..ولا تنسى تتفق معهم إنهم يسبّوا عليك ويعملولَكْ ( هُلّيلَة ) وهُمَّ قاعدين يعدموا فيك ..أو أقولَّكْ ؛ لا تطلبْ منهم يعمَلولَك هُلّيلة ولا يشتموك ؛ هُمْ لحالهم رَحْ يعملوها ؛ لأنهم خبرة تلقائية في ذلك ..!!
هذي هي الخطة كاملةً ..الآن عليك بالتنفيذ ..اسحب حالَكْ وعلى الحدود مع العراق ..أوّل ما تدخل نقطة التفتيش الأولى تذكّر بأن الكذب حرام ويقلِّلْ من هيبتك وإنك رَحْ تنعدم كمان شويّة ببطولة ؛ عشان هيك ما فيه داعي للكذب مُطلقاً ..فأوّل ما يسألوك جماعة حكومة العراق إللي عَ الحدود ( الأخ سنّي وإلاّ شيعي..؟؟ ) ..لا تكذب ..قول إنّكْ سنّي وما تخاف ..!! و بَسْ خلاص.. رَحْ ياخذوك معزّز مكرّم ..وما تعرف من وين ( الدرلاّت و المناشير الكهربائيّة ) تطلع عليك ..ولا رَحْ إِتْلَحِّقْ تتصل بأي جماعة من ( إللي بالي بالك ) ..ولا رَحْ إِتْلَحِّقْ تتصوّر يا مسكين ..ولا إِتْلَحِّقْ ( إتْشَهِّدْ ) ..وأبْصَرْ رَحْ يلاقوا جثتك وإلاّ لأ.. لأنو كل شقفة منك بـِ ( حِتّة ) ..؟؟ و كل خطتك فرطتْ لحظتها..لأنو إللي بدو يصير زَيْ صدّام حسين ؛ لازم يكون صدّام حسين نفسه..!! بس على كلٍّ :- ما راحتْ فشوش عليك ؛ رَحْ يطلعلَكْ لقب ( شهيد الدرِلْ ) أو ( شهيد المَفَكّ )..ولا البلاش..!!
المقال ينشر غدا الخميس في الانباط اليومية